- ना.रा.खराद
आपल्या कायम सोबतीला असलेला रुमाल फारच मोलाचा आहे.जवळ रुमाल नसलेला
मनुष्य फार मागास वाटतो, तुच्छ समजला जातो.रुमाल हा नेमका कोणत्या कामाचा आहे,हे सांगणे देखील कठीण,कारण तो बहुपयोगी आहे.जवळ बाळगायला सोपा. खरेदीला स्वस्त.
रुमालाचा वापर कोण कशासाठी करेल सांगता येत नाही.गरजेच्या वेळी प्रथम आठवतो तो रुमाल.आकाराने लहान मोठे, विविध रंगांचे रुमाल उपलब्ध आहेत.आवडी आणि गरजेनुसार त्याची निवड होते.रुमाल
देखील लिंगभेद करतात.लेडिज रुमाल जो आकाराने लहान, नाजूक स्त्रीसुलभ असतो.
तो तितकाच हळूवार हाताळला जातो.
प्रथम भेटीची आठवण म्हणून कित्येक रुमाल धन्य पावले आहेत.एकमेकांचे रुमाल जवळ
बाळगणे हे प्रेमीयुगुलांच्या सोयीचे असते.रुमालाचा सर्वांत जास्त संपर्क नाकाशी येतो.
नाकाचे आणि ओठांचे अंतर फार कमी, अशावेळी रुमाल धाव घेतो आणि नको असलेला ओघ थांबवतो.अनेकांचे अश्रूं पुसणारे कुणी नसते ,अशावेळी रुमालच हळहळतो आणि आपले अश्रू पुसतो.
दादा लोक रुमाल गळ्याभोवती बांधतात,त्याने दादापणाचा एक वेगळा लूक तयार होतो.
राजकीय पक्षांनी देखील रुमालाचे महात्म्य ताडले ,सर्वच पक्षांनी आपले रुमाल प्रचारात
आणले.रुमालाचे आकार आणि प्रकार शेंकडोंआहेत.रुमालाच्या वापरावरुन देखील ओळख
पटते.यू.पी., बिहारी लोकांची ओळख रुमालाने पटते.विशिष्ट धर्माचे लोक वैशिष्ट्यपूर्ण रुमाल वापरतात.रुमाल हे कट्टरपंथी लोकांचे प्रतिक आहे.किर्तनकार कंबरेला रुमाल बांधतात.रूमालाची झोळी करता येते.
लग्नात वधू वरांचे रुमाल असतात.वधूची पहिली गाठ रुमालाशी पडते.रूमालाची चुंबळ करता येते.सत्कार रूमालाने केले जातात.
भाजीपाला,फळे यांचे वहन करण्याचे काम देखील रुमाल करतो.ऐनवेळी आपली गरज
भागवितो तो रुमालच.कपड्यावरची धूळ झटकण्याचे काम तो करतो.तोंडावरुन फिरवला की बरे वाटते.कुठे जमीनीवर अंथरुन त्यावर आपण आसनस्थ होतो.कधी डोक्याखाली , उन्हात डोक्यावर, पावसाळ्यात
ओले अंग कोरडे करतो.तोंड लपवण्यासाठी देखील रुमालाचा उपयोग होतो.
रुमालाचा झोळी म्हणून उपयोग करता येतो.डोके दुखु लागले की रुमाल डोक्याला बांधला
जातो.हाड मोडले,रक्त वाहू लागले की रुमाल मदतीला येतो.इतकेच नाही चपलेचा अंगठा तुटला किंवा बूट रुतू लागला की रुमाल कामी येतो.
रुमाल आपल्या अत्यंत उपयोगाची वस्तू आहे.सर्वांनी ती जवळ बाळगली पाहिजे.तिच्याविषयी कृतज्ञ व्हावे म्हणून हा लेखन प्रपंच!
